Spurning

ESB-ríkin

Spyrjandi

Evrópuvefur

Svar

Aðildarríki ESB eru 28 talsins. Stofnríki sambandsins voru Þýskaland, Frakkland, Ítalía, Belgía, Holland og Lúxemborg en við stofnun þess árið 1958 gekk það undir heitinu Efnahagsbandalag Evrópu. Nokkrum árum áður, árið 1952, höfðu sömu ríki einnig stofnað Kola- og stálbandalagið. Á næstu þremur áratugum gengu Bretland, Írland og Danmörk (1973), Grikkland (1981), og Spánn og Portúgal (1986) til liðs við bandalagið og voru aðildarríkin þá orðin tólf talsins.

Með Maastricht-sáttmálanum árið 1993 var Evrópusambandið stofnað sem nokkurs konar þak í svonefndu stoðaskipulagi. Á sama tíma var heiti Efnahagsbandalags Evrópu breytt í Evrópubandalagið og skömmu síðar fengu Austurríki, Finnland og Svíþjóð aðild (1995). Tæpum áratugi seinna, árið 2004, gengu tíu ríki í ESB; Eistland, Lettland, Litháen, Kýpur, Malta, Pólland, Slóvakía, Slóvenía, Tékkland og Ungverjaland, og þremur árum síðar Búlgaría og Rúmenía. Með gildistöku Lissabon-sáttmálans árið 2009 var nafni bandalagsins breytt öðru sinni og hefur síðan þá heitið Evrópusambandið.

Ólík heiti Evrópusambandsins Aðildarríki og ár inngöngu
Efnahagsbandalag Evrópu (EBE) 1958: Frakkland, Vestur-Þýskaland,
Ítalía, Belgía, Holland og Lúxemborg
1973: Bretland, Írland og Danmörk
1981: Grikkland
1986: Spánn og Portúgal
Evrópubandalagið (EB) 1995: Austurríki, Finnland og Svíþjóð
2004: Eistland, Kýpur, Lettland,
Litháen, Malta, Pólland, Slóvakía,
Slóvanía, Tékkland og Ungverjaland
2007: Búlgaría og Rúmenía
Evrópusambandið (ESB) 2013: Króatía

Þann 1. júlí 2013 varð Króatía 28. aðildarríki ESB en þann 22. janúar 2012 samþykktu Króatar aðild í þjóðaratkvæðagreiðslu.

Þá hafa fjögur ríki formlega fengið stöðu umsóknarríkis (e. candidate status): Ísland, Makedónía, Svartfjallaland og Tyrkland. Albanía, Bosnía og Hersegóvína og Serbía hafa stöðu mögulegs umsóknarríkis (e. potential candidate status).
Við þetta svar er engin athugasemd Fela