MANNFJÖLDI
Um 450 MILLJÓNIR
AÐILDARRÍKI
27
ORKA
ENDURNÝJANLEG 25,2%
VERÐBÓLGA
3,3%
ATVINNULEYSI
6%
Fjármagn til reksturs Evrópuvefsins kom frá Alþingi frá 2011 til ársloka 2013. Á þeim tíma voru skrifaðar rúmlega 700 færslur um Evrópumál, aðallega svör við spurningum almennings. Í desember 2025 fékkst styrkur frá stjórnvöldum til að uppfæra vefinn og bæta við hann gervigreindarvirkni. Hver sem er getur nú spurt mállíkan á forsíðu vefsins spurninga og svar er myndað með hliðsjón af gagnasafni Evrópuvefsins. Lesendur eru hvattir til að meta gæði gervigreindarinnar með því gefa svarinu þumal upp eða niður. Ef framhald verður á starfsemi vefsins eftir 29. ágúst verður kappkostað að fá svör fræðafólks við brýnustu spurningum sem notendur spyrja gervigreindina um sumarið 2026. Sérstakur undirbúningshópur vann á ýmsan hátt að uppfærslu vefsins. Hópurinn mun áfram hafa umsjón með verkefninu og vera til ráðgjafar um hugsanlegt framhald þess í haust. Hér fyrir neðan eru ýmsar upplýsingar um verkefnið, m.a. um undirbúningshópinn og yfirlit um það hvernig starfsemi Evrópuvefsins var háttað á sínum tíma.
Hafa samband
Undirbúningshópur 2026
Um vefinn (2011-2013)
Forseti Alþingis opnaði Evrópuvef Háskólans og Alþingis fimmtudaginn 23. júní 2011 á Háskólatorgi. Stofnað var til vefsins með þjónustusamningi milli Alþingis og Vísindavefsins og hann starfar í nánum tengslum við Vísindavefinn.
Tilgangur Evrópuvefsins
Tilgangur Evrópuvefsins er að veita hlutlægar, málefnalegar og trúverðugar upplýsingar, meðal annars um:
- Aðdraganda og sögu Evrópusambandsins og undanfara þess.
- Löggjöf og réttarframkvæmd í ESB.
- Skipulag og stjórnsýslu ESB.
- Stefnu og áætlanir ESB.
- Aðildarríki ESB og afstöðu þeirra til einstakra málaflokka.
- Aðildarumsókn Íslands og hugsanleg áhrif af aðild Íslands að ESB.
Uppbygging og framsetning
Uppbygging Evrópuvefsins og framsetning efnis er með svipuðu sniði og á Vísindavefnum og styðst við reynslu sem þar hefur fengist. Meðal annars er tekið mið af eftirfarandi atriðum:
- Að veita málefnalegar og trúverðugar upplýsingar sem koma frá fróðum aðilum og lýsa sem flestum sjónarmiðum.
- Að greina skýrt á milli staðreynda annars vegar og hins vegar mismunandi viðhorfa sem eru umdeild.
- Að efni vefsins verði sem varanlegast, óháð aðstæðum þegar það er skrifað.
- Að vefurinn sé virkur og lifandi og birti sem næst eitt svar á hverjum virkum degi.
- Að svör séu vönduð, einföld og skýr almenningi og án rökvillna.
- Að framsetning efnis sé nútímaleg, með myndefni og veftenglum eftir því sem við á.
- Að hvert svar sé sjálfstæður texti með eðlilegum tilvísunum í annað efni.
Ritstjórnarleg vinnubrögð
Starfsmenn Evrópuvefsins semja svör eftir atvikum, afla svara frá öðrum höfundum, lesa efni vefsins yfir fyrir birtingu, tryggja samræmi í frágangi svara, sjá um birtingu athugasemda frá lesendum, og svo framvegis. Starfsmenn lagfæra málfar, stíl og framsetningu í svörum. Ef þörf er á eru svör ritrýnd.
Spurningar skulu bornar fram undir fullu nafni, þannig að unnt sé að staðfesta hver spyrjandi er. Hins vegar má sleppa nafni spyrjanda við birtingu óski hann þess. Höfundar svara koma ævinlega fram undir fullu nafni.
Fyrrum starfsfólk og ritstjórn
Þórhildur Hagalín var ritstjóri Evrópuvefsins 2012-2013. Hjá Evrópuvefnum hafa eftirtaldir aðilar starfað sem verkefnastjórar: Vilborg Ása Guðjónsdóttir alþjóðastjórnmálafræðingur, Þorvarður Kjerulf Sigurjónsson, MA í alþjóðasamskiptum, Brynhildur Ingimarsdóttir, MA í alþjóðasamskiptum og Lena Mjöll Markusdóttir laganemi.
Í ritstjórn hafa setið: Þorsteinn Vilhjálmsson, prófessor emeritus og ritstjóri Evrópuvefsins 2011, Erna Bjarnadóttir, hagfræðingur hjá Bændasamtökum Íslands, Margrét Einarsdóttir, lektor í Evrópurétti, Bjarnveig Eiríksdóttir lögfræðingur, Haraldur Ólafsson, prófessor í veðurfræði við HÍ, og Sverrir Jakobsson, prófessor í sagnfræði við HÍ.