Svar

Aðildarríki Evrópusambandsins skiptast á að fara með formennsku í ráðinu á hálfs árs fresti. Formennska í ráðinu er nánar skilgreind í svari við spurningunni Hvað felst í því að fara með formennsku í ráðinu?

Aðildarríkin ákveða sjálf hversu miklum fjármunum þau eyða í sinni formennskutíð. Kostnaðurinn er því breytilegur eftir ríkjum. Formennska Þýskalands í ráðinu á fyrri helmingi ársins 2007 er talin hafa verið sú dýrasta fram til þessa en kostnaðurinn við hana nam 180 milljónum evra eða tæplega 30 milljörðum íslenskra króna á genginu 164. Formennska Danmörku á fyrri hluta ársins 2012 kostaði til samanburðar 35 milljónir evra eða tæplega 6 milljarða íslenskra króna á núverandi gengi og er talin með þeim ódýrustu fram til þess tíma.

Frakkland fór með formennsku í ráðinu á síðari hluta árs 2008 og nam kostnaðurinn við hana 171 milljón evra. Liður í auglýsingaherferð landsins var að upplýsa Eiffel-turninn í París með bláum ljósaperum og stjörnunum tólf sem eru tákn um sameinaða Evrópu.

Hvert aðildarríki gerir áætlun um hversu miklu það hyggst eyða á formennskutímabili sínu og ber allan kostnaðinn af formennskunni. Það nýtur þó oftar en ekki fjárstuðnings frá innlendum fyrirtækjum og öðrum styrktaraðilum.

Fjármagninu er einkum varið í fundahöld og skipulagningu ráðstefnuhalds á vegum ráðsins, í að tryggja öryggi við slíkar samkomur, túlkun, gistingu, þjálfun og laun embættismanna sem ráðnir eru til að veita nauðsynlega þjónustu á meðan formennskunni stendur. Formennskuríkið ákveður svo hvort og þá hversu miklu það vilji eyða í annað sem viðkemur formennskunni. Ef formennskuríkið vill til að mynda bjóða fundargestum upp á sódavatn verður það að greiða þann kostnað. Hið sama gildir um skreytingar á húsakynnum ráðsins, kaup á gjöfum, auglýsingaherferðir, upplýsingagjöf, hátíðarhöld og svo má lengi telja.

Í eftirfarandi töflu eru teknar saman upplýsingar um kostnað tiltekinna aðildarríkja ESB við að fara með formennsku í ráðinu síðan árið 2007, þegar niðurröðun formennskuríkjanna í ráðinu fram til ársins 2020 var ákveðin.

Ártal	Misseri	Formennskuríki	Kostnaður (í milljónum evra)
2013	Haustmisseri	Litháen	62 (áætlaður kostnaður)
	Vormisseri	Írland	60
2012	Haustmisseri	Kýpur	46
	Vormisseri	Danmörk	35
2011	Haustmisseri	Pólland	115
	Vormisseri	Ungverjaland	85
2010	Haustmisseri	Belgía	59
	Vormisseri	Spánn	55
2009	Haustmisseri	Svíþjóð	90
	Vormisseri	Tékkland	124,5
2008	Haustmisseri	Frakkland	171
	Vormisseri	Slóvenía	62
2007	Haustmisseri	Portúgal	67
	Vormisseri	Þýskaland	180

Heimildir og mynd:

• How much does a Presidency cost? | Jon Worth. (Skoðað 30.9.2013).
• Présidence du Conseil de l´UE: le choc des communications nationales | Décrypter la communication européenne. (Skoðað 3.10.2013).
• Budget & Sponsors | Presidency & EU | Lithuanian Presidency of the Council of the European Union 2013. (Skoðað 1.10.2013).
• Irish EU Presidency, About the Presidency : Cost effectiveness and sustainability. (Skoðað 1.10.2013).
• Cyprus EU Presidency´s cost down by 16 million Euros. (Skoðað 1.10.2013).
• As EU drowns in dept, Denmark to serve tap water - EUbusiness. (Skoðað 30.9.2013).
• eu2011.hu - Hungary is preparing for a cost-efficient, but professional Presidency. (Skoðað 1.10.2013).
• Bilan Chiffres FR - Voorzitterschap cijfers FR. (Skoðað 1.10.2013).
• La présidence espagnole du Conseil de l´Union Européenne. (Skoðað 1.10.2013).
• Sweden´s Presidency budget. (Skoðað 1.10.2013).
• Presidência portuguesa da União Europeia custou 67 milhões, mais seis que o previsto - PÚBLICO. (Skoðað 2.10.2013).
• PFUE: Union européenne, présidence française, rapport de la cour des comptes. En bref - Actualités - Vie-publique.fr. (Skoðað 3.10.2013).
• REPORT ON THE SLOVENIAN PRESIDENCY OF THE EU COUNCIL. (Skoðað 1.10.2013).
• Cyprus Presidency of the Council of the European Union 2012 - Gifts. (Skoðað 3.10.2013).
• File:Blue Eiffel Tower - European Union 2008.jpg - Wikimedia Commons. (Sótt 4.10.2013).

Upprunalega spurningin hljóðaði svona:

Hver er viðbótarkostnaður þess ríkis innan ESB, af því að sinna æðstu formennsku ESB í þá sex mánuði sem þjóðirnar sinna þeirri forystu í hvert skipti?