Evrópuvefurinn: Hvernig munu gjöld á innfluttar bifreiðar breytast ef Ísland gengur í ESB?

Hlusta

Ef Ísland gengur í Evrópusambandið verður lagður 10% tollur á bíla framleidda í þriðju ríkum, eins og Japan og Bandaríkjunum, í samræmi við tollskrá Evrópusambandsins. Eftir sem áður yrðu hins vegar engir tollar lagðir á bíla sem framleiddir eru í aðildarríkjum sambandsins. Vörugjöld og virðisaukaskatt þyrfti áfram að greiða í ríkissjóð af öllum innfluttum bifreiðum.

***

Í nokkrum aðildarríkjum Evrópusambandsins (Þýskalandi, Frakklandi, Bretlandi, Tékklandi, Svíþjóð og Ítalíu) er löng hefð fyrir framleiðslu og útflutningi bíla. Þessir hagsmunir endurspeglast í sameiginlegri tollskrá ESB sem leggur 10% toll á innfluttar fólksbifreiðar sem framleiddar eru í þriðju ríkjum. Samkvæmt íslensku tollskránni er hins vegar enginn tollur lagður á bifreiðar, jafnvel þótt ekki hafi verið gerður fríverslunarsamningur við innflutningsríkið. Ef Ísland gengi í ESB þýðir þetta að innfluttar bifreiðar frá þriðju ríkjum, eins og Bandaríkjunum og Japan, yrðu hlutfallslega dýrari en bifreiðar frá aðildarríkjum ESB. Nánar er fjallað um verð á nýjum bílum eftir Evrópusambandsaðild í svari við spurningunni Hvernig mun verð á nýjum bílum breytast ef Ísland verður hluti af Evrópusambandinu?

Innflutningur bifreiða til Íslands skiptist nokkuð jafnt milli ríkja innan og utan ESB.

Vörugjöld og virðisaukaskattur eru greidd við skráningu ökutækja. Einstaklingar þyrftu því eftir sem áður að greiða þessi gjöld í ríkissjóð Íslands af innfluttum bifreiðum alls staðar frá.

Í greinargerð um tollamál frá samningahópi um fjárhagsmálefni í samningaviðræðum Íslands við ESB kemur fram að innflutningur bifreiða til Íslands skiptist í tvo nokkuð jafna hluta milli ríkja innan og utan ESB. Stærstur hluti smærri bifreiða hefur til þessa komið frá ESB en stærri bifreiðar, eins og jeppar og pallbílar, hafa komið frá Asíu og Bandaríkjunum. Líklegt er að í kjölfar inngöngu Íslands í ESB mundu innkaup á bifreiðum frá ESB-ríkjum aukast.

Við þetta má bæta að margir framleiðendur asískra smábíla hafa hafið framleiðslu í Austur-Evrópu í þeim tilgangi að losna við tolla á Evrópumarkaði. Japanskir jeppar og pallbílar, sem notið hafa vinsælda á Íslandi, eru hins vegar ekki framleiddir í þessum verksmiðjum.

Heimildir og mynd:

Greinargerð samningahóps um fjárhagsmálefni um tollamál.
Tollskrá 2011.
Mynd fengin af heimasíðu Viðskiptablaðsins, 30.9.11.

Upprunaleg spurning:

Hvernig breytast gjöld á innfluttum bifreiðum (frá Evrópu og/eða Bandaríkjum) við inngöngu í Evrópusambandið? Í dag eru bæði lagðir á tollar og vörugjöld, mun þetta breytast og þá hvernig?

Hvernig munu gjöld á innfluttar bifreiðar breytast ef Ísland gengur í ESB?

Höfundur

Útgáfudagur

Spyrjandi

Efnisorð

Tilvísun

Tengd svör á Evrópuvefnum

Er ekki rétt skilið að tollar á vörum milli ESB-ríkja falla niður við inngöngu í ESB, til dæmis þegar vara er pöntuð á Netinu?

Hversu hár er tollur ESB á vörur frá Bandaríkjunum og hve mikið mundu þær hækka hlutfallslega í verði ef Ísland gengi í ESB?

Hvað mundi breytast við aðild að Evrópusambandinu varðandi póstverslun?

Hvernig mun verð á nýjum bílum breytast ef Ísland verður hluti af Evrópusambandinu?