Evrópuvefurinn: Sjávarútvegssjóður Evrópu

Hlusta

Sjávarútvegssjóður Evrópu (e. European Fisheries Fund, EFF) starfaði á árunum 2007-2013. Samið var um stofnun hans við endurskoðun sameiginlegrar sjávarútvegsstefnu Evrópusambandsins árið 2002 en sjóðurinn tók við af svonefndri fjármögnunarleið við þróun í sjávarútvegi (e. Financial Instrument for Fisheries Guidance, FIFG).

Meginmarkmið sjávarútvegssjóðsins voru að bæta samkeppnishæfni sjávarútvegs í aðildarríkjum ESB og aðstoða við að gera hann umhverfislega, efnahagslega og félagslega sjálfbæran. Sjóðnum var enn fremur ætlað að styðja við almenn markmið sjávarútvegsstefnunnar, eins og þeirra er getið í 39 gr. sáttmálans um starfshætti Evrópusambandsins (SSE).

Styrkjum úr sjávarútvegssjóðnum var veitt til fimm forgangssviða:

Til aðlögunar fiskiskipaflotans, einkum til að draga úr sóknargetu.
Til fiskeldis, veiða í ferskvatni, vinnslu og markaðssetningar sjávarfangs og fiskeldisafurða.
Til sameiginlegra verkefna, svo sem á sviði verndunar lífríkis hafsins, þróunar nýrra markaða, kynningarátaka og frumkvöðlaverkefna, sem eru víðtækari en svo að eitt fyrirtæki sjái sér hag í að fjármagna þau.
Til sjálfbærar þróunar sjávarbyggða, í þeim tilgangi að auka efnahagslega og félagslega hagsæld íbúa.
Til tækniaðstoðar til aðildarríkjanna til að stýra sjávarútvegssjóðnum.

Áður en sjóðurinn hóf starfsemi lögðu aðildarríkin fram landsáætlun (e. National Strategic Plan) á sviði sjávarútvegs til sjö ára þar sem greint var frá stöðu sjávarútvegs í aðildarríkinu og mat lagt á hvaða aðgerðir væru nauðsynlegar til að ná markmiðum sameiginlegu sjávarútvegsstefnunnar. Hvert aðildarríki fyrir sig ákveður hversu miklir, ef nokkrir, styrkir eru veittir á hverju sviði en ríkin hafa talsvert svigrúm til að móta styrkáætlanir sínar að því skilyrði uppfylltu að engir styrkir auki veiðigetu flotans.

Meginreglan er sú að ríki eða sveitarfélög þurfa að leggja jafn mikið fjármagn til verkefna og veitt er úr sjávarútvegssjóðnum en mótframlag styrkþega getur verið misjafnt eftir verkefnum og aðstæðum á þeim landsvæðum þar sem styrkurinn er veittur.

Á tímabilinu 2007-2013 hafði sjóðurinn 4,5 milljarða evra til ráðstöfunar, á verðlagi ársins 2012. Þau ríki sem mestan stuðning fengu úr sjóðnum á tímabilinu eru Spánn og Pólland en yfirlit um úthlutanir úr sjóðnum er að finna á upplýsingablaði framkvæmdastjórnarinnar um sjóðinn.

Framkvæmdastjórn ESB lagði fram drög að stofnun nýs sjávarútvegssjóðs (e. European Maritime and Fisheries Fund, EMFF) sem hluta af endurskoðun sameiginlegu sjávarútvegsstefnunnar. Sá sjóður var starfræktur á tímabilinu 2014-2020. Honum var ætlað víðtækt hlutverk við framkvæmd sameiginlegu sjávarútvegsstefnunnar.

Sjávarútvegssjóður Evrópu

Höfundur

Útgáfudagur

Spyrjandi

Efnisorð

Tilvísun

Tengd svör á Evrópuvefnum

Um hvað snýst endurskoðunin á sjávarútvegsstefnu ESB sem nú stendur yfir?

Hver er stefna ESB í sjávarútvegsmálum?

Yrðu einhverjar breytingar á íslenska kvótakerfinu við inngöngu í ESB?

Mundi ESB-aðild breyta því hvernig tekið yrði á því ef nýr fiskistofn gengi inn í íslenska fiskveiðilögsögu? Hefði verið betra eða verra í núverandi makríldeilu að vera aðili að ESB?

Fengju erlendir togarar aðgang að veiðum innan íslenskrar efnahagslögsögu, óháð hugsanlegum útfærslum í aðildarsamningi Íslands og ESB, ef Ísland yrði aðili að ESB?