Spurning

Af hverju er Ísland ekki aðili að Geimvísindastofnun Evrópu?

Spyrjandi

Finnur Pind, Sigurjón Antonsson

Svar

Íslendingar eiga ekki aðild að Geimvísindastofnun Evrópu (e. European Space Agency, ESA) vegna þess að þeir hafa aldrei sóst eftir aðild. Í nóvember árið 2003 kom engu að síður hópur sérfræðinga frá ESA til Íslands til að kynna starfsemi samtakanna fyrir ráðamönnum og fulltrúum vísinda og rannsókna á Íslandi. Ekkert kom út úr þeim viðræðum.

Geimvísindastofnun Evrópu eru fjölþjóðleg samtök sem sett voru á laggirnar árið 1975 með það að markmiði að vera vettvangur samstarfs Evrópuríkja í geimrannsóknum og -tækni. Helstu verkefni stofnunarinnar eru eftirfarandi:

  • Að framkvæma og útfæra evrópska stefnu í geimvísindum til langs tíma, með því að leggja til sameiginleg markmið í geimvísindum og samstilla stefnur aðildarríkjanna í samráði við önnur innlend samtök og alþjóðastofnanir.
  • Að framkvæma og útfæra áætlanir og starfsemi á sviði geimvísinda.
  • Að samræma evrópsku geimferðaáætlunina og innlendar áætlanir aðildarríkjanna; einkum í tengslum við þróun gervihnattahugbúnaðar.
  • Að leggja aðildarríkjunum til samræmda iðnstefnu í samræmi við stefnur og áætlanir stofnunarinnar.


Gervihnöttur á sveimi yfir jörðinni.

Höfuðstöðvar Geimvísindastofnunarinnar eru í París í Frakklandi og árleg framlög aðildarríkjanna auk Evrópusambandsins nema um fjórum milljörðum evra. Í byrjun árs 2013 voru aðildarríkin tuttugu talsins: Austurríki, Belgía, Bretland, Danmörk, Finnland, Frakkland, Grikkland, Holland, Írland, Ítalía, Lúxemborg, Noregur, Pólland, Portúgal, Rúmenía, Spánn, Svíþjóð, Sviss, Tékkland og Þýskaland. Pólland gerðist aðili árið 2012 og er því nýjasta aðildarríkið. Fleiri ríki eru að semja um inngöngu.

Aðild að Geimvísindastofnun Evrópu er óháð aðild að Evrópusambandinu eins og sjá má af listanum yfir aðildarríkin. ESA eru sjálfstæð samtök sem eiga þó í nánu samstarfi við Evrópusambandið í gegnum rammaáætlanir þess um vísindi og tækni. Um 20% af árlegum fjárframlögum til ESA kemur frá Evrópusambandinu.

Öll aðildarríki ESA leggja samtökunum til fjármagn sem hlutfall af landsframleiðslu. Í staðinn á hátækniiðnaður í aðildarríkjunum möguleika á að fá tækniþróunarverkefni sem eflir mjög rannsóknir og nýsköpun í ríkjunum.

Heimildir og mynd:

Upprunalegar spurningar:

Gæti Ísland tekið þátt í Evrópsku Geimvísindastofnuninni (ESA) eða verið hluti af annarri geimvísindastarfsemi?

Hver er ástæðan fyrir því að Ísland er ekki aðili að European Space Agency eins og öll önnur Vestur-Evrópuríki?

Um þessa spurningu

Dagsetning

Útgáfudagur 7.3.2013

Flokkun:

Evrópumál > Stofnanir

Tilvísun

Sævar Helgi Bragason. „Af hverju er Ísland ekki aðili að Geimvísindastofnun Evrópu?“. Evrópuvefurinn 7.3.2013. http://evropuvefur.is/svar.php?id=22639. (Skoðað 14.8.2018).

Höfundur

Sævar Helgi Bragasonnemi í stjarneðlisfræði

Við þetta svar er engin athugasemd Skrifa athugasemd Fela Reglur um birtingu athugasemda

Skrifa athugasemd