Evrópuvefurinn: Transparency International

Hlusta

Transparency International eru alþjóðleg samtök sem stofnuð voru árið 1993 og berjast gegn spillingu um allan heim. Aðalstöðvar samtakanna eru í Berlín í Þýskalandi en sérstakar landsdeildir starfa á vegum þeirra í um það bil 100 löndum.

Markmið samtakanna er að ná langtímaárangri í baráttunni gegn spillingu en samtökin einbeita sér fyrst og fremst að gegnsæi í opinberum fjármálum ríkja, vitundarvakningu, eftirlitsstarfi, forvörnum, auk þess sem þau leggja áherslu á þróun nauðsynlegrar löggjafar. Árlega birta samtökin lista (e. Corruption perception list) yfir spillingarstig einstakra landa en þær upplýsingar eru byggðar á skýrslum landsdeilda samtakanna og viðtölum við embættismenn, fulltrúa frjálsra félagasamtaka og við fólk úr viðskiptalífinu.

Spillingarlisti samtakanna hefur verið gagnrýndur fyrir sumpart þrönga skilgreiningu á spillingu þar sem einungis er litið á spillingu sem vísvitandi misnotkun á umboðsvaldi ríkisins. Þá sé ekki litið til þátta er lúta að svikum eða mútum á fjármálamarkaði, í viðskiptalífinu og í borgaralegum stofnunum sem eiga að þjóna almannahag.

Samkvæmt spillingarlista stofnunarinnar var Ísland meðal minnst spilltu þjóða í heimi frá árinu 1999-2008. Í kjölfar efnahagskreppunnar hefur staða Íslands hins vegar versnað í samanburði við önnur lönd en Ísland var í ellefta sæti á listanum yfir minnst spilltu ríki heims árið 2012.

Samtökin leggja mikla áherslu á aðgengi að upplýsingum og halda úti öflugri heimasíðu þar sem nálgast má nánast allt útgefið efni samtakanna frá upphafi.

Transparency International

Höfundur

Útgáfudagur

Spyrjandi

Efnisorð

Tilvísun

Tengd svör á Evrópuvefnum

Hversu langt á Tyrkland í land með að uppfylla inngönguskilyrði ESB?

Mundi spilling á Íslandi aukast eða minnka með inngöngu í Evrópusambandið?