Evrópuvefurinn: Breytast reglur um vaxtabætur og barnabætur ef við göngum í ESB?

Hlusta

Nei, aðild að Evrópusambandinu hefur engin áhrif á íslenskar reglur um vaxta- og barnabætur. Breytingar á reglum um vaxtabætur og barnabætur yrðu eftir sem áður í höndum stjórnvalda á Íslandi.

***

Vaxtabætur og barnabætur eru bætur greiddar af ríkinu til einstaklinga, sem eru skattskyldir á Íslandi, á grundvelli VI. kafla tekjuskattslaga (nr. 90/2003) um tekjuskattsútreikning, afslætti og barnabætur. Engar núgildandi tilskipanir eða reglugerðir Evrópusambandsins um skattamál hafa áhrif á rétt ESB-ríkja til úthlutunar slíkra bóta; þeim er í sjálfsvald sett hvort og þá hvernig þau standa að slíkri úthlutun. Að sjálfsögðu þurfa stjórnvöld þó að taka tillit til meginreglna sambandsins svo sem um bann við mismunun á grundvelli ríkisfangs.

Forræði í skattamálum er að langmestu leyti hjá aðildarríkjum Evrópusambandsins sjálfum. Nokkur samræming hefur átt sér stað meðal aðildarríkjanna á sviði óbeinna skatta, svo sem virðisaukaskatts, en valdheimildir á sviði beinna skatta, til að mynda tekjuskatts, eru nær alfarið í höndum stjórnvalda í aðildarríkjunum. Undantekningin frá því varðar fyrst og fremst skattlagningu fyrirtækja og reglur um upplýsingaskipti milli stjórnvalda ESB-ríkja á sviði beinna skatta. Nánar er fjallað um skattastefnu Evrópusambandsins í svari við spurningunni Er samræmd stefna í skattamálum innan ESB?

Börn að leik.

Evrópusambandið hefur þar að auki takmarkaðar valdheimildir á sviði félagsmála, og engar á sviði fjölskyldumála, en barnabætur og vaxtabætur eru í raun verkfæri stjórnvalda til að koma félagsmálastefnu sinni í framkvæmd.

Á Íslandi eiga þeir rétt til barnabóta sem eru skattskyldir hér á landi og hafa á sínu framfæri börn sem eru yngri en 18 ára. Bæturnar eru tekjutengdar og ákvarðaðar samkvæmt skattframtali. Þær eru reiknaðar í fyrsta skipti vegna barns í álagningu árið eftir að það fæðist og í síðasta skipti í álagningu á því ári sem það nær 18 ára aldri. Bæturnar skiptast í fjórar greiðslur yfir árið.

Fjárhæð barnabóta skerðist um þær barnabætur eða hliðstæðar bætur sem framfærandi hefur fengið erlendis frá á sama tekjuári vegna barnsins, en barnabætur eru til í einhverri mynd í flestum ef ekki öllum aðildarríkjum Evrópusambandsins (sjá samanburð á barnabótum ESB-ríkjanna 15 frá árinu 2003).

Þeir sem greiða vaxtagjöld af lánum vegna kaupa eða byggingar á íbúðarhúsnæði til eigin nota geta átt rétt á vaxtabótum og sama á við um þá sem keypt hafa búseturétt eða eignarhlut í kaupleiguíbúð. Bæturnar ákvarðast samkvæmt upplýsingum á skattframtali og til að fá vaxtabætur þarf að gera sundurliðaða grein fyrir lánum og vaxtagjöldum. Þær eru hugsaðar til að auðvelda fólki að eignast íbúðarhúsnæði.

Vaxtabætur eru til í einhverjum löndum Evrópusambandsins, að minnsta kosti á Írlandi og í Lúxemborg, en virðast þó ekki jafn algengar í löndum sambandsins og barnabætur.

Mynd:

Sameining leikskóla - Dv.is. (Sótt 01.02.2013).

Breytast reglur um vaxtabætur og barnabætur ef við göngum í ESB?

Höfundur

Útgáfudagur

Spyrjandi

Efnisorð

Tilvísun

Tengd svör á Evrópuvefnum

Er samræmd stefna í skattamálum innan ESB?

Ef Ísland yrði hluti af ESB yrðu íslensk stjórnvöld þá neydd til að lækka virðisaukaskatt svo að íslensk verslun stæðist samkeppni frá öðrum Evrópuríkjum?

Nú hefur ESB reiknað út skattbyrði landa sinna fyrir árið 2011, hvert er hlutfall Íslands til samanburðar?