Evrópuvefurinn: Alþjóðahafrannsóknaráðið

Hlusta

Alþjóðahafrannsóknaráðið (e. International Council for the Exploration of the Sea, ICES) er alþjóðleg vísindastofnun. Stofnunin er sú elsta sinnar tegundar en hún var stofnuð árið 1902 í Kaupmannahöfn. Aðildarríki ráðsins eru 20 talsins þar af 14 ESB-ríki, Belgía, Danmörk, Eistland, Finnland, Frakkland, Holland, Írland, Lettland, Litháen, Pólland, Portúgal, Spánn, Svíþjóð og Þýskaland, auk Bandaríkjanna, Bretlands, Kanada, Íslands, Noregs og Rússlands.

Hlutverk Alþjóðahafrannsóknaráðsins er að samhæfa haf- og fiskirannsóknir í Norður-Atlantshafi. Undir ráðið heyra á annað hundrað formlegar vinnunefndir sem fjalla um aðgreind verkefni á þessum sviðum. Rannsóknastofur þátttökuríkjanna og um 1600 vísindamenn á þeirra vegum taka þátt í vinnu ráðsins. Út frá niðurstöðum rannsókna sinna veitir ráðið leiðbeiningar um veiðar á einstökum stofnum í Norður-Atlantshafi. Hafrannsóknastofnun Íslands starfar náið með ráðinu og eiga Íslendingar fulltrúa sem situr í auðlindastjórnunarnefnd.

Alþjóðahafrannsóknaráðið og Evrópusambandið starfa saman á grundvelli tvíhliða þjónustu- og samstarfssamnings sem kveður á um að ráðið veiti sambandinu árlega ráðgjöf um ástand fiskistofna í Norður-Atlantshafi auk annarra tilfallandi verkefna. Árlegar tillögur framkvæmdastjórnar ESB um leyfilegan heildarafla í Evrópusambandinu eru meðal annars byggðar á vísindalegri ráðgjöf Alþjóðahafrannsóknaráðsins.

Heimild:

Welcome to ICES. (Sótt 12.02.2026).

Alþjóðahafrannsóknaráðið

Höfundur

Útgáfudagur

Síðast uppfært

Spyrjandi

Efnisorð

Tilvísun

Tengd svör á Evrópuvefnum

Hver er stefna ESB í sjávarútvegsmálum?

Yrðu einhverjar breytingar á íslenska kvótakerfinu við inngöngu í ESB?