Evrópuvefurinn: EFTA-dómstóllinn

Hlusta

Dómstóll Fríverslunarsamtaka Evrópu (e. European Free Trade Association, EFTA), oftast nefndur EFTA-dómstóllinn, hefur lögsögu yfir EFTA-ríkjum sem eiga aðild að EES-samningnum, Íslandi, Liechtenstein og Noregi. Hlutverk EFTA-dómstólsins er fyrst og fremst að tryggja samræmda túlkun og beitingu EES-samningsins og þeirra ákvæða í löggjöf ESB sem tekin eru efnislega upp í þann samning. Slíkt samræmi er forsenda þess að markmið EES-samningsins um einsleitt markaðssvæði geti náðst.

EFTA-dómstóllinn fjallar um:

mál sem eftirlitsstofnun EFTA (e. EFTA Surveillance Authority, ESA) vísar til hans vegna gruns um að EFTA-ríki hafi ekki staðið við skuldbindingar sínar samkvæmt EES-samningnum um innleiðingu, beitingu eða túlkun EES-reglna,
mál er varða lausn deilumála milli tveggja eða fleiri EFTA-ríkja,
mál sem aðildarríki eða einstaklingar höfða vegna ákvörðunar eftirlitsstofnunar EFTA,
og gefur ráðgefandi álit varðandi túlkun á EES-samningnum.

Dómsvald EFTA-dómstólsins er því svipað og dómsvald dómstóls Evrópusambandsins (e. Court of Justice of the European Union) yfir aðildarríkjum ESB.

Þrír dómarar starfa við EFTA-dómstólinn, einn frá hverju EFTA/EES-ríki. Þeir eru skipaðir til sex ára í senn og velja sér forseta til þriggja ára. Málsmeðferð fyrir EFTA-dómstólnum skiptist í skriflegan og munnlegan hluta og fer hún fram á ensku nema þegar dómstóll í aðildarríki hefur óskað eftir ráðgefandi áliti. Í slíkum tilfellum er álit EFTA-dómstólsins birt á ensku og þjóðtungu þess ríkis sem bað um að álitið yrði veitt.

Heimild:

EFTA Court. (Sótt 3.02.2026).

EFTA-dómstóllinn

Höfundur

Útgáfudagur

Síðast uppfært

Spyrjandi

Efnisorð

Tilvísun

Tengd svör á Evrópuvefnum

Af hverju þurfa Íslendingar að fara eftir reglum sem Evrópusambandið setur, þó svo að Ísland sé ekki í ESB?

Hver er munurinn á EFTA og ESB?

Hvað kemur fram í norsku skýrslunni um samband Noregs og ESB?