Spurning

Er ekki sanngjarnt að helmingur styrks frá ESB til að kynna sig á Íslandi renni til andstæðinga ESB-aðildar, eða að íslenska ríkið veiti þeim jafnháa fjárhæð, 5,0 milljarða króna á ári?

Spyrjandi

Magnús Axelsson

Svar

Evrópusambandið áætlar að verja 1,4 milljónum evra í kynningarmál hér á landi yfir tveggja ára tímabil, eða rúmum 230 milljónum íslenskra króna á genginu í ágúst 2011. Umsjón verkefnisins var boðin út haustið 2010 og þann 11. ágúst 2011 var tilkynnt að samið hefði verið um verkið við fyrirtækin Media Consulta International og Athygli almannatengsl. Gert er ráð fyrir að upplýsingaskrifstofa á þeirra vegum opni í byrjun árs 2012, undir heitinu Evrópustofa - Upplýsingamiðstöð ESB.

Þá úthlutaði Alþingi Evrópuvaktinni, Heimssýn og Já Ísland styrkjum að upphæð 27 milljónir króna þann 1. september 2011. Styrkjunum ber að renna til verkefna sem stuðla að opinberri og upplýstri umræðu og fræðslu um Evrópusambandið, stefnu þess og áhrif hugsanlegrar aðildar Íslands að sambandinu. Alþingi hafði áður veitt Evrópuvefnum tólf milljónir króna til loka árs 2011. Loks má geta þess að Evrópusambandið veitir ríkjum sem hafa sótt um aðild stuðning samkvæmt svokallaðri IPA-áætlun (Instrument for Pre-Accession Assistance) en sá stuðningur snýr ekki að kynningarmálum heldur stjórnsýslu umsóknarríkis.

***

Átta umsækjendahópar voru valdir til áframhaldandi þátttöku í útboði ESB fyrir kynningarmál undir lok árs 2010. Þeir höfðu frest til að skila inn lokagögnum til 7. febrúar 2011. Hóparnir voru sem hér segir:

  1. B & S Europe, Premisa d.o.o. og InWentw
  2. College of Europe og Evrópuréttarstofnun Háskólans í Reykjavík
  3. Congress Service Center, Albany Associates, M.C. Triton og AP almannatengsl
  4. ECORYS, Alþjóðamálastofnun Háskóla Íslands og Góð samskipti
  5. EIR Development Partners, KOM, Pomilio Blumm og European Movement Latvia
  6. INTRASOFT og HCL Consultants Ltd.
  7. Media Consulta International og Athygli almannatengsl
  8. SAFEGE, European Service Network, Aspect Relations Publiques og Cecoforma

Í það minnsta þrír af umsækjendahópunum átta drógu sig út úr umboðsferlinu, þar á meðal hópurinn sem Alþjóðamálastofnun Háskóla Íslands tók þátt í. Einn í hópnum, breska fyrirtækið Ecorys, taldi ESB ætla að verja of litlu fjármagni í verkefnið. Samstarfsaðili Evrópuréttarstofnunar Háskólans í Reykjavík, College of Europe í Brugge, Belgíu, dró sig sömuleiðis úr ferlinu, að sögn vegna mikils umfangs verkefnisins. Loks dró belgíska ráðgjafarfyrirtækið Cecoforma til baka þá umsókn sem það stóð að, en það setti einna helst fyrir sig háan launakostnað á Íslandi. Eins og áður sagði tóku Media Consulta International og Athygli almannatengsl verkefnið að sér að lokum.

Hvað varðar styrki íslenska ríkisins til kynningarmála hefur Alþingi veitt Evrópuvefnum tólf milljónir króna til loka árs 2011. Þá auglýsti Alþingi í júní 2011 eftir styrkumsóknum til að stuðla að opinberri og upplýstri umræðu og fræðslu um Evrópusambandið, stefnu þess og áhrif hugsanlegrar aðildar Íslands að sambandinu. Úthlutunarnefnd sem forsætisnefnd Alþingis skipaði til að úthluta styrkjunum lauk störfum 1. september 2011. Úthlutunarfé til ráðstöfunar nam 27 milljónum króna.

Alls bárust nefndinni 18 umsóknir og uppfylltu átta þeirra skilyrði sem kveðið er á um í úthlutunarreglum. Þrír aðilar hlutu styrk: Evrópuvaktin, Heimssýn og Já Ísland. Samkvæmt fréttatilkynningu frá Alþingi var sérstaklega gætt að því að fjárveitingar til andstæðra sjónarmiða til Evrópusambandsaðildar væru sem jafnastar. Sótt var um styrki til fjölbreyttra verkefna, svo sem fyrirlestra, þýðinga, ráðstefnuhalds og rannsókna.

Um annars konar fjárveitingar frá Evrópusambandinu er það að segja að sambandið veitir ríkjum sem hafa sótt um aðild stuðning samkvæmt svokallaðri IPA-áætlun (Instrument for Pre-Accession Assistance). Sá stuðningur snýr ekki að kynningarmálum heldur er markmið hans að búa stjórnsýslu umsóknarríkis sem best undir að takast á við umsóknarferlið og sömuleiðis inngönguna ef til þess kemur. Jafnframt er reynt að búa svo um hnútana að stuðningur samkvæmt áætluninni nýtist þó að ekki komi til aðildar enda eru umsóknarlönd þegar í tengslum við ESB og verða það væntanlega áfram óháð afdrifum umsóknar. Sjá nánar um þátttöku Íslands í IPA í svari við spurningunni Í hverju felst áætlun ESB um aðstoð við umsóknarríki? Þar sem við höfum sótt um slíka aðstoð, þurfum við þá ekki að fullnægja skilyrðum um aðlögun að regluverki ESB? Hvernig yrði það gert?

Þetta svar var uppfært 11.8.2011, 6.9.2011 og 5.12.2011

Heimildir og mynd:

Um þessa spurningu

Dagsetning

Útgáfudagur 5.7.2011

Tilvísun

Vilborg Ása Guðjónsdóttir. „Er ekki sanngjarnt að helmingur styrks frá ESB til að kynna sig á Íslandi renni til andstæðinga ESB-aðildar, eða að íslenska ríkið veiti þeim jafnháa fjárhæð, 5,0 milljarða króna á ári?“. Evrópuvefurinn 5.7.2011. http://evropuvefur.is/svar.php?id=60095. (Skoðað 19.3.2024).

Höfundur

Vilborg Ása Guðjónsdóttiralþjóðastjórnmálafræðingur og verkefnastjóri á Evrópuvef

Við þetta svar er engin athugasemd Fela