Spurning

Samstarfsvettvangur ESB og nágrannaríkja þess í austri

Spyrjandi

Evrópuvefur

Svar

Samstarfsvettvangur Evrópusambandsins og nágrannaríkja þess í austri (e. Eastern Partnership) var stofnaður á fundi leiðtoga ESB og sex nágrannaríkja þess í Austur-Evrópu og Suður-Kákasus í Prag árið 2009. Samstarfinu er ætlað að efla efnahagslegt og stjórnmálalegt samband ESB og samstarfsríkjanna; Armeníu, Aserbaídsjan, Hvíta-Rússlands, Georgíu, Moldavíu og Úkraínu. Efling mannréttinda og réttarríkis í samstarfsríkjunum, sem öll eru fyrrum ríki Sovétríkjanna, eru á meðal höfuðmarkmiða samstarfsvettvangsins.

Samstarfsvettvangurinn er starfræktur innan regluverks evrópsku nágrannastefnunnar en gengur þó lengra hvað varðar tvíhliða samstarf milli ESB og samstarfsríkjanna sem og milli samstarfsríkjanna innbyrðis.

Samstarfsvettvangurinn á meðal annars að auðvelda ferðalög borgara milli samstarfsríkjanna, en langtímamarkmiðið er að afnema vegabréfsáritanir. Einnig er ætlunin að koma á fót víðtæku samkomulagi um fríverslun milli ESB og samstarfsríkjanna. Þá á að byggja upp og efla opinberar stofnanir í samstarfsríkjunum með fjárhagslegri aðstoð frá ESB og ýta almennt undir efnahagslega og félagslega þróun í ríkjunum. Hvert samstarfsríki gerir samning við ESB um hvernig þessum markmiðum skuli náð, en samningarnir eru komnir mislangt á veg. Samstarfssamningar ESB og Úkraínu og Moldavíu eru til að mynda langt komnir, og þættir eins og einföldun vegabréfsáritana hafa þegar tekið gildi, á meðan viðræður um samning ESB og Hvíta-Rússlands hafa ekki hafist.

Leiðtogafundir um samstarfsvettvanginn eru haldnir annað hvert ár en utanríkisráðherrar þátttökuríkjanna koma saman til fundar árlega.

Um þessa spurningu

Dagsetning

Útgáfudagur14.6.2013

Tilvísun

Evrópuvefur. „Samstarfsvettvangur ESB og nágrannaríkja þess í austri“. Evrópuvefurinn 14.6.2013. http://evropuvefur.is/svar.php?id=65461. (Skoðað 19.1.2018).

Höfundur

Evrópuvefur

Við þetta svar er engin athugasemd Skrifa athugasemd Fela Reglur um birtingu athugasemda

Skrifa athugasemd