Á árunum 2012-2013 kom stundum fyrir að sumir rugluðust á á Evrópuvefnum annars vegar og Evrópustofu hins vegar. Evrópuvefurinn og Evrópustofa gegndu á þessum tíma bæði því hlutverki að vera upplýsingaveita um Evrópusambandið en störfuðu algjörlega óháð hvort öðru.
Evrópuvefurinn hefur frá upphafi verið rekinn af Vísindavef Háskóla Íslands og á árunum 2013-2013 fyrir fjármagn frá Alþingi. Samkvæmt þjónustusamningi Vísindavefsins og Alþingis er tilgangur Evrópuvefsins að veita hlutlægar, málefnalegar og trúverðugar upplýsingar um Evrópusambandið og Evrópumál. Starfsemi Evrópuvefsins á árunum 2011 til ársloka 2013 fólst fyrst og fremst í rekstri vefsíðu þar sem spurningum lesenda var svarað að fyrirmynd Vísindavefsins, sem hefur svarað spurningum almennings um hvers kyns vísindi frá árinu 2000.
Hverjum sem er gafst þá kostur á að senda inn spurningar og þeim var svarað svo fljótt sem auðið var, ýmist af starfsmönnum Evrópuvefsins eða öðrum höfundum. Allt kapp var lagt á að svörin væru málefnaleg og vönduð og að skýrt væri greint á milli staðreynda annars vegar og viðhorfa hins vegar. Nánar er fjallað um Evrópuvefinn í svörum við eftirfarandi spurningum Fær Evrópuvefurinn framlög frá ríkinu eða einhverjum öðrum til þess að halda úti vefnum? og Er beinagrind Evrópuvefjarins búin til af starfsmönnum ESB og er hún, að efni til, svipuð og í öðrum löndum sem hafa hafið umsóknarferli að ESB?
Starfsmenn Evrópuvefsins héldu einnig á þessum tíma kynningar á starfsemi vefsins og mikilvægi hlutlægra upplýsinga í umræðunni um Evrópusambandið. Slíkar kynningar voru fyrst og fremst haldnar í framhaldsskólum en einnig meðal annars í Samskiptamiðstöð heyrnarlausra og heyrnarskertra.
Evrópustofa var upplýsingamiðstöð Evrópusambandsins um sjálft sig. Hún var fjármögnuð af framkvæmdastjórn Evrópusambandsins og rekin af Athygli ehf. og þýska almannatengslafyrirtækinu Media Consulta. Evrópustofa hætti starfsemi 1. september 2015 en í ágúst sama ár rann út samningur um rekstur upplýsingamiðstöðvarinnar. Á vefsíðu Evrópustofu var markmið hennar tilgreint á þennan hátt: „að stuðla að aukinni umræðu, þekkingu og skilningi á eðli og starfsemi ESB“. Á vefsíðunni má nálgast frekari upplýsingar um hvernig starfsemi Evrópustofu var háttað á sínum tíma.
Evrópuvefurinn var endurvakinn árið 2026 en í desember 2025 fékkst styrkur frá stjórnvöldum til að til að uppfæra vefinn og bæta við hann gervigreindarvirkni. Hver sem er getur nú spurt mállíkan á forsíðu vefsins spurninga og svar er myndað með hliðsjón af gagnasafni Evrópuvefsins.
Hjálpaðu okkur að greina gæði gervigreindarinnar með því að segja okkur hvort svarið var gott eða slæmt.
Takk fyrir þátttökuna!
MANNFJÖLDI
Um 450 MILLJÓNIR
AÐILDARRÍKI
27
ORKA
ENDURNÝJANLEG 25,2%
VERÐBÓLGA
3,3%
ATVINNULEYSI
6%
