Spurning

Hvar eru höfuðstöðvar Evrópusambandsins?

Spyrjandi

Birnir Snær Helgason, f. 1991

Svar

Evrópusambandið sjálft á sér ekki einar höfuðstöðvar. Sérhver stofnun sambandsins hefur aðsetur á ákveðnum stað og er staðsetningin tilgreind í bókun 6 við Sáttmálann um starfshætti Evrópusambandsins (Lissabon-sáttmálann).

  • Evrópuþingið (European Parliament) hefur aðsetur í Strassborg í Frakklandi og kemur þar saman til mánaðarlegra þingfunda svo og til fundar um fjárlagafrumvarp. Aðrir allsherjarfundir eru haldnir í Brussel og koma nefndir þingsins einnig saman þar. Aðalskrifstofa Evrópuþingsins og þjónustudeildir þess eru hins vegar í Lúxemborg.
  • Ráðið (Council of the European Union), sem áður hét ráðherraráðið (Council of Ministers), hefur aðsetur í Brussel en heldur fundi sína í Lúxemborg í apríl, júní og október. Það kemur saman samkvæmt fundarboði forseta ráðsins, sem sendir það út að eigin frumkvæði eða að ósk einhvers þess sem á sæti í ráðinu eða framkvæmdastjórnarinnar.
  • Leiðtogaráðið (European Council) kemur saman tvisvar á hverju sex mánaða tímabili, og sér forseti þess um að kalla það saman. Það hefur ekki formlegt aðsetur en fundar yfirleitt í Brussel og nýtur aðstoðar aðalskrifstofu ráðsins.


Dómstóll Evrópusambandsins.

  • Framkvæmdastjórnin (European Commission) hefur aðsetur í Brussel. Hún kemur yfirleitt saman á hverjum miðvikudegi í Brussel nema þær vikur sem Evrópuþingið þingar í Strassborg, þá fundar hún einnig í Strassborg. Í samræmi við ákvörðun sem tekin var í tengslum við Samrunasáttmálann (Merger Treaty) frá 1967 eru ákveðnar þjónustudeildir framkvæmdastjórnarinnar þó staðsettar í Lúxemborg, meðal annars Útgáfustofa Evrópusambandsins (Publications Office of the European Union) og Hagstofa Evrópusambandsins (Eurostat).
  • Dómstóll Evrópusambandsins (Court of Justice of the European Union) hefur aðsetur í Lúxemborg.
  • Endurskoðunarrétturinn (Court of Auditors) hefur aðsetur í Lúxemborg.
  • Efnahags- og félagsmálanefndin (European Economic and Social Committee, EESC) hefur aðsetur í Brussel.
  • Svæðanefndin (Committee of the Regions, CoR) hefur aðsetur í Brussel.
  • Fjárfestingarbanki Evrópu (European Investment Bank) hefur aðsetur í Lúxemborg.
  • Seðlabanki Evrópu (European Central Bank) hefur aðsetur í Frankfurt am Main í Þýskalandi.
  • Evrópulögreglan (Europol) hefur aðsetur í Haag í Hollandi.

Heimildir og mynd:

Um þessa spurningu

Dagsetning

Útgáfudagur24.6.2011

Flokkun:

Evrópumál > Stofnanir

Tilvísun

Þórhildur Hagalín. „Hvar eru höfuðstöðvar Evrópusambandsins?“. Evrópuvefurinn 24.6.2011. http://evropuvefur.is/svar.php?id=12928. (Skoðað 22.9.2018).

Höfundur

Þórhildur HagalínEvrópufræðingur og fyrrverandi ritstjóri Evrópuvefsins

Við þetta svar er engin athugasemd Skrifa athugasemd Fela Reglur um birtingu athugasemda

Skrifa athugasemd