Svar

5. desember stóð Evrópuvefurinn fyrir kynningu á vefnum í Samskiptamiðstöð heyrnarlausra og heyrnarskertra. Markmið heimsóknarinnar var fyrst og fremst að fjalla um mikilvægi hlutlægra upplýsinga í tengslum við Evrópusambandið og aðildarviðræðurnar og að benda á hvar þær er að finna. Kynningin var því með sama sniði og þær sem starfsmenn Evrópuvefsins hafa haldið í framhaldsskólum á undanförnum misserum. Tveir túlkar á vegum Samskiptamiðstöðvarinnar sáu um að túlka fyrirlesturinn á táknmál.

Að kynningu lokinni sköpuðust líflegar umræður og var gestum gefinn kostur á að leggja inn spurningar fyrir Evrópuvefinn. Flestum voru efst í huga mál sem snúa að einstaklingum sem eiga táknmál að móðurmáli svo sem hvort aðildarsamningurinn verði þýddur á íslenskt táknmál, hvort sérstaklega sé gætt að réttindum minnihlutahópa innan aðalsamninganefndar, hvert atvinnuhlutfall heyrnarlausra sé innan ESB í samanburði við Ísland og hvort sérstakar ESB-reglur gildi um rétt heyrnarlausra til vinnu. Svör við spurningunum munu birtast á Evrópuvefnum á næstunni.

Starfsmenn Evrópuvefsins voru einnig beðnir um að taka upp tákn fyrir íslensku táknmálsorðabók SignWiki-vefsíðunnar. Hægt er að nálgast upptökurnar með því að smella á eftirfarandi spurningar:

• Hvernig eru "aðildarviðræður" og "Evrópuvefur" á táknmáli?
• Hvernig er "Evrópusambandið" og "ESB" á táknmáli?

Evrópuvefurinn vill að lokum þakka Samskiptamiðstöð heyrnarlausra og heyrnarskertra fyrir góðar móttökur!